
那洛巴大师教言集NARO20ལྷན་ཐབས།
1-4-9b

༄༅། །ལྷན་ཐབས།
༄༅། །ལྷན་ཐབས་ཡིན་ནོ། །དཔལ་ཧེ་རུ་ཀ་ལ་ཕྱག་འཚལ་
ལོ། །དང་པོ་རང་སྐད་ཅིག་གིས་ཧེ་རུ་ཀར་བསམས་པའི་སྙིང་ཁར་ཡི་གེ་ཧཱུཾ་བསམས་པའི་འོད་ཟེར་གྱིས། བླ་མ་དང་། བདེ་མཆོག་ལྷ་ལྔའི་དཀྱིལ་འཁོར་སྤྱན་དྲངས་ཏེ། ཡིད་ཀྱིས་
ཕྱག་བྱས་མཆོད་པ་དབུལ། དེ་ཡང་གཟུགས་རྡོ་རྗེ་མ་སྐུ་མདོག་དཀར་མོ་ཕྱག་ན་མེ་ལོང་བསྣམས་ལ། སྐུ་ཕྱི་ནང་མེད་པར་གསལ་བར་བྱེད་པ། སྒྲ་སྔོན་མོ་པི་ཝང་བསྣམས་པ། ཏྲི་སེར་མོ་
དུང་ཆོས། རོ་དམར་མོ་ཐོད་པ་བྱང་སེམས་ཀྱིས་བཀང་བ། རེག་བྱ་ལྗང་ཁུ་ལྷའི་ན་བཟའ་པཎ་ཙ་ལི་ཀ་བསྣམས་པ་སྤྲུལ་ལ། ཡི་དམ་གྱི་ལྷ་བཞེས་གཅིག་ཅེས་དབུལ། དེ་ནས་བདག་ཉིད་ཀྱི་
སྙིང་ཁའི་ཡི་གེ་ཧཱུཾ་ལས་འོད་འཕྲོས་རིགས་ཀྱི་ཡུམ་བཞི་ལ་ཕོག་པས། མཁའ་འགྲོ་མ། ལ་མ། དུང་སྐྱེས་མ། གཟུགས་ཅན་མ་བཞིས་ཤ་ལྔ་བདུད་རྩི་ལྔས་བཀང་བའི་ཐོད་པ་ཐོགས་
1-4-10a

ཏེ་མཆོད་པར་བསམ། དེ་ནས་ཡུམ་ལ་ཐིམ་ནས་བདེ་བས་མཆོད་པར་བསམ། ཕྱིའི་མཆོད་པ་ནི་མེ་ཏོག་ལ་སོགས་པའོ། །སྙིང་ཁའི་ཧཱུཾ་ལས་འཐེན་པར་བསམ།
དེ་ནས་སྡིག་པ་བཤགས། མདུན་གྱི་ལྷ་གཤེགས་སུ་གསོལ་དེ་ནས་ཧཱུཾ་གི་འོད་ཟེར་ནས། ས་བྷ་བས་སྟོང་པ་ཉིད་དུ་བསམ། སྟོང་པའི་ངང་ལས་རམ་ལས་ཉི་མའི་སྟེང་དུ་ཧཱུཾ་ལས་འོད་
ཟེར་འཕྲོས་ཏེ། ཁམས་གསུམ་གྱི་སེམས་ཅན་ཐམས་ཅད་དཔལ་ཧེ་རུ་ཀའི་རང་བཞིན་དུ་གྱུར་ནས་རྡོ་རྗེའི་ལྟེ་བའི་ཧཱུཾ་ལ་ཐིམ། དེ་གྱུར་པ་ལས་བདག་ཉིད་ཧེ་རུ་ཀར་གྱུར་པར་བསམ། དེ་
ཡང་རྒྱ་ཆ་ལུགས་དང་ལྡན་པར་བསམ་མོ། །དེ་ནས་རང་ཉིད་ཀྱི་སྙིང་གར་སྣ་ཚོགས་པདྨ་བསམས་ཏེ། དེའི་སྟེང་དུ་འོད་འཕྲོས། རང་དང་འདྲ་བའི་ཡེ་ཤེས་སེམས་དཔའ་མདུན་གྱི་ནམ་
མཁའ་ལ་སྤྱན་དྲངས་ནས་ཛཿཧཱུཾ་བཾ་ཧོཿབདག་ཉིད་ལ་བསྟིམས་པར་བྱའོ། །སྐུ་གསུང་ཐུགས་བྱིན་གྱིས་བརླབས་པ་ནི། དཔྲལ་བ། མགྲིན་པ། སྙིང་ཀར་པདྨ་དང་ཟླ་བའི་སྟེང་དུ་ཨོཾ་ཨཱཿ
ཧཱུཾ་གསུམ་བསམ། ཡང་དེ་ཉིད་ལས་འོད་ཟེར་འཕྲོས་ཏེ། བདེ་མཆོག་ལྷ་ལྔའི་དཀྱིལ་འཁོར་མདུན་གྱི་ནམ་མཁའ་ལ་སྤྱན་དྲངས་ཏེ། སྔར་བཞིན་མཆོད་ནས་གསོལ་བ་བཏབ། གཙོ་བོའི་
1-4-10b

ཐུགས་ཁ་ནས་ཡོན་ཏན་གྱི་ལྷ་མོ་ཕྱུང་ཏེ་(སྟེ་)བདག་ལ་དབང་བསྐུར་ནས། དབང་རྟགས་མི་བསྐྱོད་པ་བྱུང་བར་བསམ། དེ་ནས་བདུད་རྩི་མྱང་བར་བྱའོ། །དེ་ནས་རྫོགས་རིམས་འདི་ལྟར་བསྒོམས་
ཏེ། འཁོར་ལོ་བཞིའི་སྤྱི་བོར་ཧཾ། མགྲིན་པར་ཨོཾ། སྙིང་གར་ཧཱུཾ། ལྟེ་བར་ཨ་བསམས་ཏེ། སྔར་བཀོད་པའི་འཁོར་ལོ་ཚོའི་དྲི་མ་དང་ཡི་གེ་བསྲེགས་པར་བྱས་ལ། ཧམ་ལས་བྱང་སེམས་
ལྟེ་བའི་ཨ་ལས་བབས་པས་བདེ་སྟོང་དབྱེར་མེད་དུ་བསྒོམ་པར་བྱའོ། །དུ་བ་ལ་སོགས་པའི་རྟགས་རྙེད་ནས་སྤྲིན་མེད་པའི་ནམ་མཁའ་ལྟ་བུའི་ཆོས་ཉིད་མངོན་དུ་བྱའོ། །མ་གོམས་
པའི་དབང་གིས་སྐྱོ་བར་གྱུར་ན། དཔལ་ཧེ་རུ་ཀ་གཞའ་ཚོན་ལྟ་བུ་ལ་དམིགས་ཏེ་བཟླས་པ་བྱའོ། །དེ་ནས་གཏོར་མ་གཏོང་ན། དང་པོ་བྱང་ཆུབ་སེམས་བསྒོམ། དེ་ནས་སྟོང་པ་ཉིད་ཀྱི་
ངང་ནས་ཡཾ་གཅིག་གྱུར་པ་ལས་རླུང་གི་དཀྱིལ་འཁོར། དེའི་སྟེང་དུ་རམ་ལས་མེ། ཀཾ་ལས་མི་མགོ་གསུམ་གྱི་སྒྱེད་བུ། དེའི་སྟེང་དུ་ཨ་ལས་མིའི་ཐོད་པ་བསམ། དེའི་དབུས་སུ་བྷྲུཾ་
ལས་དྲི་ཆེན། ཤར་དུ་མུ་ལས་དྲི་ཆུ། ལྷོར་ར་ལས་རཀྟ། ནུབ་ཏུ་ཤུ་ལས་བྱང་སེམས། བྱང་དུ་མཾ་ལས་ཀླད་པ། ཤར་ལྷོར་གོ་ལས་རྟའི་ཤ །ལྷོ་ནུབ་ཏུ་ཀུ་ལས་ཁྱིའི་ཤ །ནུབ་བྱང་
1-4-11a

དུ་ན་ལས་བ་གླང་གི་ཤ །བྱང་ཤར་དུ་ཧ་ལས་གླང་པོ་ཆེའི་ཤ །དབུས་སུ་ན་ལས་མིའི་ཤ །དེ་ནས་ཐོད་པའི་དབུས་ཀྱི་ནམ་མཁའ་ལ་ཨོཾ། དེའི་སྟེང་དུ་ཧཱུཾ་
བསམས་ལ། དེ་ནས་ཨོཾ་ཨཱཿཧཱུཾ་བསམས་ལ། དེ་ནས་ཨོཾ་ཨཱཿཧཱུཾ་ཞེས་བརྗོད་པ་ལས། རླུང་གིས་མེ་སྤར་ནས་ཐོད་པ་དྲོས་ནས་ནང་དུ་རྫས་རྣམས་ཁོལ་བར་བསམས་ལ། ཨོཾ་ལྷུང་བས་
རྒྱ་ཆེན་པོར་གྱུར་པར་བསམ། ཨཱཿལྷུང་བས་ཟག་མེད་ཀྱི་བདུད་རྩིར་གྱུར་པར་བསམ། ཧཱུཾ་ལྷུང་བས་རྡོ་རྗེ་ཁོག་སྟོང་གི་ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་འཕྲོས་པས་དེ་བཞིན་
གཤེགས་པ་ཐམས་ཅད་ཀྱི་སྦྱོར་འཚམས་(མཚམས་)ནས་ཡེ་ཤེས་ཀྱི་བདུད་རྩི་སྤྱན་དྲངས་ནས། རྡོ་རྗེའི་སྦུ་གུ་ནས་བབས། དམ་ཚིག་གི་བདུད་རྩི་དང་འདྲེས། རྡོ་རྗེ་དཀྲུགས་པས་དེ་ཡང་ཞུ་བར་
བསམ་མོ། །དེ་ནས་ཨོཾ་ཨཱཿཧཱུཾ་ལན་བདུན་བརྗོད་པས། ཟག་མེད་ཀྱི་བདུད་རྩི་ཆེན་པོར་བསམས་ཏེ་བྱིན་གྱིས་བརླབ་པའོ། །དེ་ནས་མཛུབ་མོ་མདུད་པ་ཞེས་བྱ་བའི་ཕྱག་རྒྱ་དག་ཨོཾ་ཨ་ར་
ལི་ཧོཿ ཛཿཧཱུཾ་བཾ་ཧོཿ བཛྲ་ཌ་ཀི་ནི་ས་མ་ཡ་སྟྭཾ། ཨོཾ་ཏྲི་ཤ་ཧོ་ཞེས་བྱ་བའི་སྔགས་ལན་གསུམ་མམ་ལྔའི་བར་དུ་བརྗོད་པས། འགྲོན་ཐམས་ཅད་སྤྱན་དྲངས་ལ། དེ་ནས་སྙིང་ཀའི་ཧཱུཾ་ལས་འོད་
1-4-11b

ཟེར་འཕྲོས་ཏེ། སྐད་ཅིག་དེ་ཉིད་ལས་བདེ་མཆོག་ལྷ་ལྔའི་དཀྱིལ་འཁོར་དུ་གྱུར་པར་བསམ། དེ་རྣམས་ཀྱི་ལྕེ་ཧཱུཾ་ལས་རྡོ་རྗེའི་སྦུ་གུ་ཅན་དུ་བསམས་ཏེ། རྡོ་རྗེ་ཐལ་མོ་ཁ་ཕྱེ་བའི་ཕྱག་རྒྱ་བཅིངས་ལ།
ཨོཾ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ་ཡཀྵ་སརྦ་བྷུ་ཏ་པྲེ་ཏ་བི་ཤ་ཨུད་མ་ཏ། ཨ་ས་སྨ་ར། ཌ་ཀི་ནི་ད་ལ། ཨི་མཾ་གྷྲི་ལིཾ་གྷྲི་ཎ་དུ། ས་མ་ཡ་རཀྵན་ཏུ། མ་མ་སརྦ་སིད་དྷི་སྤྲ་ཡད་ཚད་དུ། ཡ་ཐེ་བཾ།
ཡ་ཐེ་ཥྚོཾ། བྷུ་ཛྙཱ་ཐ། པི་པ་ཐ། ཛྙི་གྷྲ་ཐ། མ་ཏི་ཀྲ་མ་ཐཱ། མ་མ་སརྦ་ཀ་ར་སད་དུ་ཁ། བི་ཤུད་དྷ་ཡ། སརྦ་ཡོ་ག་བྷ་ཝ་ན་ཏུ་ཧཱུཾ་ཧཱུཾ་ཕཊ་སྭཱཧཱ། ཞེས་བྱ་བའི་སྔགས་ཀྱིས་དབུལ་བར་བྱའོ། །
དེ་ནས། རྡོ་རྗེ་ཕག་མོ་བདེ་གཤེགས་ཡུམ། །འདོད་པའི་དབང་ཕྱུག་དཔལ་ལྡན་མ། །མཁའ་འགྲོ་ཆེན་མོ་རྣལ་འབྱོར་གཙོ། །རྡོ་རྗེ་དབྱིངས་ཀྱི་ཁྲོ་རྒྱལ་མ། །ཕྱག་རྒྱ་ཆེན་མོ་རྡོ་རྗེའི་སྐུ། །ཧེ་རུ་ཀ་
དང་ཡང་དག་སྦྱོར། །དབུ་སྟོང་མ་ལ་སྤྱན་སྟོང་མ། །སྟོང་ཕྲག་བཅུའི་ཞལ་གདོང་ཅན། །ཞེས་པ་ལ་སོགས་པའི་བསྟོད་པས་ཀྱང་བསྟོད། ཀེམ་རུས་འཇིགས་སུ་རུང་པའི་ཁྲི་སྟེངས་སུ། །བདུད་
འདུལ་ཧཱུཾ་ལས་ཁྲོ་ཆེན་སྐུ་སྤྲུལ་པ། །འཇིགས་བྱེད་ཧེ་རུ་ཀ་དང་དཔལ་རྒྱལ་ཆེན་པོ། །སྐུ་མདོག་མཐིང་ནག་རབ་ཏུ་འབར་བའི་འོད། །ཞེས་པས་བསྟོད། འདོད་པའི་དོན་ལ་གསོལ་བ་བཏབ། གཏོར་
1-4-12a

མ་ས་གཙང་སར་སྤུང་ངོ་། །ཨྠིྀ།། །།


目录
ལྷན་ཐབས།